خليني ساكتة ١٨٧ - الإنسانية ما بتتجزأ وضحايا الزلزال أهلنا.. بس التطبيع مع "النظام العفن" مش مقبول!
#زلزال_تركيا_وسوريا #الجلسة_التشريعية #التيار_الوطني_الحر #رياض_سلامة #اضراب_المصارف #ملحم_خلف #نجاة_صليبا
كتير صعب الواحد يكمل حياته بس يكون في كوارث حقيقية محيطة فيه
كيف بده اله الواحد عين يحكي عن مشهد سخيف متل المشهد اللبناني قدام مأساة الشعبين التركي والسوري بعد الزلزال
بتحس الكرة الارضية عم تتحرك ونحن واقفين محلنا، وكل حركة بهالكوكب بتثبت قديشينا نحن بقعره
كل عمرنا عايشين بعصفورية طوائف ومذاهب وحروب ومن بعدها عشنا بعصفورية اقتصادية متنكرة باسم هندسات مالية وصولا مؤخرا على العصفورية القضائية ووصلنا مع الزلزال عالصفورية العلمية، حتى الخبراء والدكاترة والعلماء بهالبلد او بالقليلة بعضهم طلعوا مهزلة اكيد بتناغم لا متناهي من الاعلام الرهيب، اكيد كمان مش كله لان كبار القوم بالاعلام اختصاصهم مصارف واوضاع مصارف.
على فكرة هول المصارف المالية، مش الصحية، بس بالنتيجة كله بطوف. المصارف الها حوالي اسبوع مأضربين، مع التهديد بالتصعيد واحتجاز حتى المعاشات والفريش دولار. باختصار هول المصارف عم يقولولنا، او منسرقكم ومننهبكم انتو وراضيين او منعطل لكم مصالحكم وبالنتيجة رح نسرقكم وننهبكم.. انتو اختاروا الطريقة اللي بتناسبكم لنسرقكم وننهبكم.
باختصار المصارف بترضى وبترجع تفتح بس تتحقق مطالبها، عدم المس برأس مالها، تعليق كل الاحكام والدعاوى القضائية بحقها (هيدا على فكرة مش تدخل بالقضاء، هيدا تمني)، بيع املاك الدولة لتحصل الخسائر التي المت بمحفظتها المالية (وهيدا اصلا مش انه كان محسوب إفلاس الدولة وبيعها قطع)، رد اللي هي بناسبها من اموال المودعين وبالليرة، هلق هو البصل صار بالدولار بلبنان، بس المصارف بدها تدفع بالليرة، ليه شو هي عم بتبيع بصل؟
والاهم من كل هيدا انها صارت مع الكابيتول كونترول، وصار بدها تضغط باتجاه جلسة تشريعية الكابيتول كونترول والتمديد للواء عباس ابراهيم.. ٤٦ نائب رفضوا الحضور واكدوا انهم لن يفعلوا ذلك إلا لانتخاب رئيس جمهورية، هول ال ٤٦ نائب اللي منهم قوات وكتائب وتغييرين ومستقلين صار موقفهم معروف بكتير من القضايا، الا انهم غير متفقين على اسم مرشح لرئاسة الجمهورية، بس هني لو اتفقوا او ما اتفقوا، ولو اعترضوا او ما اعترضوا بيبقى الامر الناهي ما تبقى من المجلس النيابي، اولا لإنهم أكترية وثانيا لأنهم يستطيعون..
غير هول ال ٤٦ نائب في الاكترية اللي هني ٨٢، هول الثنائي الأكثر وطنيا، وحليفه الأكثر هنجعية، وحلفائهم، وبعض المحسوبين على أنهم نواب أمة، هيدي المجموعة عم تلعب عالقطعة، متل حزب العزة والكرامة اللي هو دايما مع مصلحة الشعب، بس دايما الامور بتصير غصب عنه مثلا بهاي الجلسة هو ضد الكابيتول كوترول بس مضطر يحضرها لإن في اللواء بالدق معقول يغيب عن جلسة التمديد؟ وعلى فكرة جمع الموضوعين على جدول الاعمال ضربة نبيه، يعني مش كتير كتار اللي من صالحهم يسودوا وجهم مع سوبرمان لبنان.. وخصوصي رئيس تيار اللي ما خلونا، وبعدين لصالح مين الشغور بالمؤسسات الأمنية؟ يوم بدكم تبعتوا وراهم عالتحقيق ويوم بدكم تعطلوا التمديد؟
اللواء أصلا مش كتير عباله يمدد، بس هو قال ما رح يتخلى عن واجباته الوطنية في حال ما اله بديل، وطبيعي نحن عنا بالطايفة ما منتخلى عن حدا بس واحد ياخد كرسي بيحتفظ فيه للأبد.. كمان كبير اللصوص رياض سلامة قال هو ما بده يمدد ولا يجدد وبده يطوي الصفحة بس يفل من حاكمية مصرف لبنان بعد ٣٠ سنة من الادارة الرشيدة للملف المالي، قديه حلو انه كل مدراء الصف الأول مطلوبين للعدالة بشكل أو بآخر؟
على الهامش نحن شعب حضرنا مأساة الشعبين التركي والسوري، بالزلزال الاخير وكنا عم نشوف حالنا بكل صورة وفيديو، وبس عم نصلي، حتى المش كتير مؤمن أخد بنصيحة وزير الداخلية وصلّي على قاعدة إذا ما نفعت ما بتضر، ولإن الصلاة هي الشي الوحيد اللي ممكن يحمينا، بظل انعدام أي أمل لإلنا بدولة ممكن تكون قادرة على القيام فينا كشعب، إلاّ إذا شكّلنالها مصدر سرقة جديد، ونحن كشعب منكوب منفيدها اكتر، بترجع المساعدات وبترجع مزاريب الفساد، وبالقليلة الزعماء بلاقوا مين يشيل عنهم شقلة إعاشات.
قبل ما اختم موقف بموضوع المساعدات لضحايا زلزال سوريا، في مشهدين من جهتنا نحن كلبنانيين، المشهد الحقيقي اللي هو من بطولة الشعب والدفاع المدني، والمساعدات للشعب السوري والتركي، ومشهد مشرف ومحق لإنه الانسانية ما بتتجزأ، الوقوف مع الشعب السوري الاعزل اللي ما بيلحق يوعى من مجازر الحروب ليوقع ضحية كارثة طبيعية. وفي مشهد التطبيع مع النظام العفن، وزيارة النظام المجرم اللي بالنسبة اله الزلزال أكمل ما لا يستطيع هو فعله. والكلام عن رفع عقوبات قيصر هو كلام سياسة للاتجار بدم الشعب، ومن أفضل من محور الممانعة بلعب هيدا الدور.
العقوبات الدولية ما بتمنع وصول المساعدات الانسانية، واللي بيمنع وصولها هو عدم تعاون النظام، لما بيرفض انها توصل للجمعيات اللي بيوثق فيها المجتمع الدولي.
ان شاء الله موت اذا عم كذب بس الشيخ نبيل قاووق قال أميركا التي ضربت هيروشيما وناجازاكي بالنووي، هي نفسها اليوم التي تمنع المساعدات الإنسانية العاجلة عن الشعب السوري، علماً أن هناك مشاهد في سوريا أبكت الحجارة، ولكن قلوب المسؤوليين الأميركيين أشد قسوة من الحجارة”.. انا عندي سؤال انه ليه دايما بدنا نعاتب الاميركان إذا نحن مسلمين جدل انه هني الشيطان الأبعد ليه دائما منتظرين منهم خير و انهم يشعروامعنا؟ وغير انه نحن اصلا مش بحاجة لاذن بما اننا محور مفعم بالعقوبات يعني ما لازم نخاف من عقوبات جديدة انا شخصيا بقول بلا الاميركان وجميلتهم واذا قصد محور العزة والكرامة بيقدر يوصل للشعب السوري المساعدات من نفس الطريق اللي وصل فيها الاسلحة والمقاتلين لنصرة النظام.. ما جحا اولى بأهل بيته خليني ساكتة