Жасөспірімдер арасында бокстан ел біріншілігі
Өскеменде жасөспірімдер арасында бокстан Қазақстан чемпионаты өтті. Сайысқа 300-ге жуық спортшы қатысты. Ал ақтық мәреге тек 30-дан астам жасөспірім іріктеліп шықты. Кіл мықтылар анықталатын спорт бәсекесіне арна тілшілері де барып қайтты.
Турнир 2009-2010 жылғы жасөспірімдер арасында ұйымдастырылды. Сайыс тартысты өтті.
Жекпе-жекке шыққан әрбір жас боксшы болашақта еліміздің намысын халықаралық додалар да қорғар жеңімпаз, спортшы болуды мақсат еткен.
Алыстан ат терлетіп келген былғары қолғап шеберлері жанкүйерлерінің үкілі үмітін ақтауға тырысты. Жеңісті қолдан бермей, қарсыластарын басымдықпен жеңуге бар күштерін салды.
Бокстан әлем чемпионы Мерей Ақшаловтың айтуынша, спортшылардың талпыныстары өте жақсы. Жас боксшылардың арасынан алдағы уақытта әлем чемпиондары шығатындығына сенім мол.
14 жастағы Алихан Рамазанов Павлодар облысынан келген. Болашақ бокс шебері бұл жарысқа ұзақ дайындалғанын айтады.
Арманы асқақ жас талантты боксшының бірі Санжар Мәдиұлы. Келешекте жеңімпаз саңлақ атану басты мақсаты.
Республикалық жарыста бақ сынауға талпынған жасөспірімдер жоғарғы деңгейде қолғап түйістірді. Жаттықтырушылардың айтуынша спорттың бұл түріне қызығушылар саны артып барады.