"Leyli Məcnun" Məşq prosesi
22 Noyabr 2011-ci il tarixində "İRƏLİ" Gənclik Mərkəzinin Şuşa zalında "Leyli və Məcnun" layihəsinin video çarxının və www.leylimajnun.az saytının təqdimat mərasimi keçirilmişdir. Mərasimdə layihənin müəllifi və rəhbəri, Mədəniyyət və Turizm Nazirliyinin İncəsənət şöbəsinin aparıcı məsləhətçisi Mirsahib Musayev, "İRƏLİ" İctimai Birliyinin baş katibi Rauf Mərdiyev, layihənin koordinatoru Niyaz Əliyev, həmçinin müziklın baş rol ifaçılarından Natavan Həbibi, Elşad Xose, Oksana Rəsulova, Elnur Məmmədov, Azad Şabanov, Murad Quliyev (MC Murad), xoreoqraf Çarlz Laurens və tamaşanın ssenari müəllifi və quruluşçu rejissoru İradə Gözəlova iştirak etmişlər.
İlk öncə "İRƏLİ" İctimai Birlyinin baş katibi Rauf Mərdiyev qonaqları salamlamış, layihənin Azərbaycan və ümumilikdə gənclər üçün əhəmiyyətindən söz açmışdır.
Sonra layihə rəhbəri Mirsahib Musayev layihə barədə daha ətraflı məlumat vermiş, layihə ilə bağlı gələcək planlardan söz açmışdır.
Daha sonra rejissor Samir Fərzəlibəyovun hazırladığı zalında "Leyli və Məcnun" layihəsinin video çarxı və ""İRƏLİ" İnformasiya Texnologiyaları Mərkəzi tərəfindən hazırlanmış www.leylimajnun.azsaytı iştirakçılara təqdim olunmuşdur.
Sonda təşkilatçılar və layihə iştirakçıları jurnalistləri maraqlandıran sualları cavablandırmışlar.
Qeyd edək ki, dahi Azərbaycan şairi Nizami Gəncəvinin "Leyli və Məcnun" poeması əsasında qurulan müzikl dünyada və ölkəmizdə ilk dəfə olaraq gerçəkləşdirilir.
Dekabrın ortalarında Heydər Əliyev Sarayında premyerası nəzərdə tutulan layihənin təşkilatçıları Azərbaycan Respublikasının Mədəniyyət və Turizm Nazirliyi ilə "İRƏLİ" İctimai Birliyi, Baş Sponsor Bakcell, sponsor isə "AvroMed" şirkətidir.
"Əfsanə geri dönür" şüarı altında gerçəkləşdirilən müziklin məqsədi qədim Azərbaycan motivləri əsasında yazılmış "Leyli və Məcnun" poemasını hip-hop janrı ilə müasir şəkildə yenidən gündəmə gətirməkdir. Musiqili tamaşa Nizami Gəncəvinin eyniadlı poemasına uyğun olaraq "Leyli və Məcnun" adlanır.
Minlərlə insanın böyük həyəcanla gözlədiyi tamaşanın rəqslərinə ABŞ-ın Çikaqo ştatından olan istedadlı xoreoqraf Çarlz Laurens quruluş vermişdir. Çarlz Laurens tərəfindən müzikl üçün quruluş veriləcək rəqsləri Azərbaycanın tanınmış ritm ifaçısı, əməkdar artist Natiq Şirinovun ritm qrupu müşayiət edəcəkdir. Bununla yanaşı muasir janrda təqdim ediləcək musiqilərdə Azərbaycanın milli musiqi alətləri olan tar, kamança, balaban, tütək, nağara və uddan istifadə edilir.
Xatırladaq ki, 2 aydan çoxdur ki, hazırlaqları davam edən tamaşada Leyli obrazını Natavan Həbibi, Məcnun obrazını Elşad Xose, Məcnunun atası rolunu Alim Qasımov, Leylinin atası rolunu meyxana ustası Ağamirzə, İbn Salamı Elnur Məmmədov, Zeyd obrazını Azad Şabanov, Zeynəb obrazını isə Oksana Rəsulova canlandırır. Rejissorun əlavəsi olan "Şeytan" obrazını tamaşanın musiqi və aranjemanlarının müəllifi MC Murad, "Günəş adamı" obrazını isə Natiq Şirinov canlandıracaqlar. Layihənin müəllifi və rəhbəri Mədəniyyət və Turizm Nazirliyinin İncəsənət şöbəsinin aparıcı məsləhətçisi Mirsahib Musayev, layihənin koordinatoru, "İRƏLİ" İctimai Birliyinin üzvü Niyaz Əliyev, tamaşanın ssenari müəllifi və quruluşçu rejissoru İradə Gözəlova, tamaşanın quruluşçu rəssamı Rəşad Ələkbərovdur.