Балалар шығармашылығын дамыту
Қазіргі таңда кітап оқитын жастар қатары азайып кеткені рас. Десе де, бұл қазына мекені, руханият ордасына айналған кітапханалар қаңырап, бос тұр деген сөз емес. Бүгінгі күні ол жерде де жастар мен оқушыларды білімге, жанжақтылыққа баулу үшін бірқатар жұмыстар атқарылып жатыр. Облыс орталығындағы Оралхан Бөкей атындағы орталық қалалық кітапхана осы сөзіміздің бірден бір дәлелі.
Жас өрендердің шығармашылық қиялы мен қабілетін дамыту балалық шақтан басталады. Балалар тілді меңгере отырып, заттарды, олардың қасиеттері, белгілері туралы білімді игереді. Ал орталық қалалық кітапханада балаларға арналған шығармалар көп. Оқырман кез-келген уақытында мұнда келіп кітаптарды оқи алады.
Айта кетейік, кітапхана қызметкерлері жас буынның жан-жақты дамуы үшін бар жағдайды жасап жатыр. Мәселен, мұнда 10-нан астам үйірме жұмыс істейді. Атап айтқанда, арнайы тіл мамандары сабақ беретін қазақ және ағылшын тілі үйірмелері, көркем сөз, «JAS TALANT» актерлік шеберлік негіздері, «БуМагия» шығармашылық студиясы, тоғызқұмалақ, шахмат, VR-киіз үйі мен түрлі IT-курстары бар.
Әрине, кітап оқыған өте пайдалы. Әсіресе, ертегі әлемі балаларды ерекше елітіп әкететіні сөзсіз. Бірақ сол өзің оқыған ертегінің желісі бойынша мультфильм түсірсең, тіпті ғажап емес пе. Мультфильм түсірудің кереметін кітапхананың балалар бөлімі жанынан ашылған мультстудия үйірмесіне баратын бүлдіршіндер жақсы біледі.
Балалар шығармашылығының өзіне тән ерекшелігі бар. Ал олардың шығармашылық қабілеттерін дамыту – замана талабы.