Диде Ватан - Вугар Идрисов
Стихотворение на лезгинском языке.
Lezgi dilinde sheir.
Poem in Lezgian language.
Диде ватан, вуч хабар я,
Къе лезги мез лал я вучиз?
Лезги балад мецел алайди
Гьидан-гьадан чIал я вучиз?
Вичел лезги тIвар алайдан,
Къуьнел халкьдин пар алайдан,
Са миллетдин кар алайдан,
Кьилел алай къал я вучиз?
Чидач и кар гзафбуруз,
Лезгийри фу недмаз кьуруз,
Чи лезги чил чарабуруз,
Ацазвай са кал я вучиз?
Жечни залан бес къе ви тар,
Кумачирла вичик лувар
Садаз я вун гьар къуз сувар
Садаз рикIин тал я вучиз?
Гьей лезгияр ша жен чун сад,
Чун садвилиз жеда азад!
Къуй талгьурай Вугара мад,
Зи ватан бейгьал я вучиз?