GÖRMƏYƏYDİM KAŞ... / AKİF XƏZAN (QARAYEV)
XƏZAN LİRİKASI / MM VERSİYASI (FHD)
🍁🍁🍁🍁🍁🍁🍁🍁🍁🍁🍁🍁
Görməyəydim kaş...
Əzəldən dönükmüş talenin üzü,
Həsrətlər soyutdu ürəyimizi,
Sevginin nəfəsi isitmir bizi,
Sönür ocağında köz yavaş-yavaş,
Öləydim, bu günü görməyəydim kaş...
Keçdik sınaqlardan, bağladıq ülfət,
Sonumuz vüsalla bitmədi fəqət,
Ağlar günə qalıb yetim məhəbbət,
Qurumur könlümün gözlərində yaş,
Öləydim, bu günü görməyəydim kaş...
Dünyalar içində dünyam dağılıb,
Buludlar Günəşin zindana salıb,
Bizi qovuşduran yollar boş qalıb,
Sanki qədəmlərdən asılıbdı daş,
Öləydim, bu günü görməyəydim kaş...
Hicranın acısın çəkənlər bilər,
Ovutmur ruhumu sənsiz küçələr,
Divarlar üstümə gəlir gecələr,
Sıxılıb bir küncə qalmışam çaş-baş,
Öləydim, bu günü görməyəydim kaş...
Akifəm, son sevdam gətirdi kədər,
Son ümid payım da bəsləndi hədər,
Eşqində yanılmış yad aşiq qədər
Sənin də ömründə sanıldım nimdaş,
Öləydim, bu günü görməyəydim kaş...
Akif Xəzan
Sumqayıt şəhəri
03.12.2021