H. Lalthanmawii (1959 - 2021)
Kan ngaih em em Pi H. Lalthanmawii hi Pu Khuangthuama (L) leh Pi Thantluangi Sailo (L) te karah October Ni 20, 1959 ah an unau zinga a pathumna ni turin Puilo khuaah alo piang a, pianpui unau hmeichhe 2 leh mipa pathum a nei. Puilo khua atang hian Kawlkulh-ah an pem phei a, K. Vanlalsawma, Pu Lianzinga (L) leh Pi Aithuami te fa hming koh nen February Ni 1, 1982 -ah Kawlkulh North Kohhran Biak In-ah Rev. S. Lalhluma’n Biak In hawngin a inneih tira, hemi hnu hian a pasal thawhna Bangalore lamah inhruai thlain; fanu pakhat Gracy Lalawmpuii an nei a. Army atanga a pasal a pension hnu kum 1996 March thlaah Chawlhhmun, Aizawl-ah an rawn inbeng bel a, vawiin ni thleng hian an cheng zui ta a ni.
Pi H. Lalthanmawii hi Bible chhiar leh tawngtai ngaina mi tak a ni a, Pathian fak a lam te hi nuam a ti thin hle; Bible hi vawi 12 chhiar chhuak tawhin a vawi 13-na tur chhiar mek in Jeremia |ah hla thleng a chhiar zo hman a. Amah hi mi tawng tam lo leh mi inthlahrung thei tak a ni a. Chhung leh khat leh thiante ngaihsak mi tak anih bakah thenrual kawm thiam tak a ni bawk. Nilaini apiangin a thiante nen Biak In-ah tawngtaihona an nei thin a, sawmtu an neih chuan mimal inah te hun an hmang bawk thin. Amah hi mize tlawm tak ni mahse, dik nia a hriatah chuan huaisen taka ding tlat leh midangte nena inrem duh mi, hmangaihna ngah tak a ni. “Thinrim ula sual erawh sual suh u, In thinur niin tlakpui suh se. Ephesi 4:26” tih thu hi a nunpui tlat leh chhungkuaah pawh a sawi zin pawl tak a ni.
A tleirawl tirh atanga Kohhran leh khawtlang ah a phak ang tawk a inhmang thin a ni a. KTP Committee member te niin NPSS zirtirtu a ni bawk.YMA Committee member te pawh lo ni tawh thinin Kohhran hmeichhe rawngbawlna lamah pawh mi tangkai tak a ni. Kum 2014 leh 2016-ah te Kohhran hmeichhe Group Leader leh Treasurer nihna te lo chelh tawhin, Kohhran hmeichhe Inkhawm-ah Thuhril rawngbawl hna a chelh mek bawk a. A dam phawt chuan mi chhiat thatah kal a tum hram hram thin. Tin, Kohhran-ah hian Nilai zan thupui hawngtu, Inrinni zan leh Pathianni Chawhnu ah thuhril rawngbawlhna chelh lai mek a ni.
Vanduai thlak takin August Ni 25, 2021 (Nilaini)-ah Covid 19 positive a ni tih hriatchhuah a ni a. Hemi zan hian Chawlhhmun 4C ah dah luh nghal a ni. A tirah symptom engmah a nei lova, a tuk September Ni 26, 2021(Ningani) zan lamah a khuasikin a tlun tan a, thawhah te a neih chhoh tak zel avangin September Ni 2, 2021 (Ningani) zan-ah ZMC ICU Ward-ah admit nghal a ni a. A dinhmunin ziawm lam a pan theih tak loh avangin September Ni 6, 2021 (Thawhtanni) atanga Full Ventilator (Incubate) tura buatsaih a ni a, incubate an tih hma hian a pasal leh a fanu in phone call hmangin Pathian hnenah an hlan a, chumi hnuah, “Pathian hnenah lawmthu lo sawi ula, lo tawngtai chhunzawm zel rawh u” tiin a chah let a, hei hi a aw kan hriat hnuhnung ber a ni zui ta a ni. ZMC a thawktu Doctor leh Nurse te’n theihtawp chhuahin an enkawl a, tha zel tura kan ngaih laiin October Ni 5, 2021 (Thawlehni) chawhma lam atang khan a dinhmun ahniam thu hriat a ni a. Heta tang hian that lam aiin zual lam a pan ta zawk a, a tuk October Ni 6th, 2021 (Nilani) Zan Dar 10:10 P.M ah a Lalpa hnena chatuana chawl hlen turin min kalsan ta ni.
A boral cham vawikhatna a lo thlen hian amah kan ngaih a zualin amah hriatreng nan a hla duh em em te zinga mi hmanga hla thlan programme kan siam hi chhungkhat laina, thenrual thate leh a rawngbawlpui te’n min lo hmanpui theuh turin kan sawm a che u.