V-Day engtin? Hei hi lo ngaithla ve teh
V-Day Sermon - Hmangaihna hlu!
Thangtharten heti taka Valentine’s Day ngaihhlut kan intihhmuh hma daih tawh khan Mizo chanchinah hmangaihna thawnthu ropui leh lungkuai tak tak hriat tur a lo awm fo tawh thin. Fiamthuin an sawi thin a, ‘Valentine’s Day hria aiin hre pha lote an rinawm zawk’ tiin.
Hmangaihna hi a ropui a, inngaihzawnna hi mihring inlaichinna hlu tak a ni. Hmangaihna hi a hlu a, rinawm lohna hmanga tihbawrhban phal chi a ni lo. Inngaihzawnna hi mihring inlaichinna thûk tak a ni a, kal paha pal liam puat puat chi a ni lo. Hmangaihna hi V-Day kan uar thar ták avanga hlu thar ta thut a ni lo va, inngaihzawngte inkar azirin a hluin a mawi mai zawk a ni. Hmangaihna tak takah chuan ni tin mai hi hmangaihte ni a ni; V-Day hi sex day ni lovin, hmangaihna lan chhuahtirna ni a ni.
Hei hi kan ngaihtuah ngai em? Kohhran thalai active member tan ngaihzawng neih kual dêm dûm te, pakhata rinawm theih lohte hi thil mawi a ni lo. Eng mi pawh ni la, i hmangaih tan rinawm takin awm la, i hmangaihna lantir fo rawh; mihring thil neih hlu a ni a, a dawngsawngtu tan dam siai siaina a ni si a!