Yuxuda Bu Adamı görmüsünüzmü? Ever Dream This Man? - Yuxu haqqında ARAŞDIRMA
@Yuxuda kanalına abunə olun!
Yuxuda Bu Adamı görmüsünüzmü? Ever Dream This Man? - Yuxu haqqında ARAŞDIRMA
Heç yuxuda adam görmüsünüzmü? Heç şübhəsiz ki, görmüsünüz. Yəqin ki, yuxuda adam görməyin yozumu həmişə olmasa da nə zamansa sizin üçün maraqlı olub. Amma bir adam da var ki, onu yuxuda görmək az qala bütün dünya üçün maraqlıdır. Onun əslində kim olduğu bəlli deyil. Amma bir hekayəsi var. Buyurun, siz də onun haqqında hazırladığım bu videonu izləyin və Bu Adamın hekayəsini dinləyin.
2006-cı ilin yanvar ayında Nyu-Yorkda məşhur bir psixiatrın qadın xəstələrindən biri daha əvvəl görmədiyi insanın yuxuda ona həyatıyla bağlı bir sıra tövsiyələr verdiyini bildirir. O, yuxuda gördüyü şəxsin şəklini çəkib psixiatra göstərir. Bəzi mənbələrə görə isə həmin şəkli psixiatr özü – qadının etdiyi təsvirlər əsasında çəkib.
Bir neçə gün sonra isə həmin psixiatrın kişi xəstələrindən də biri o şəkli görür. Həmin şəkildəki obraz onun da yuxusuna girən adamın siması idi. O da yuxusuna girəni daha əvvəl real həyatda heç zaman görmədiyini söyləyir. Psixiatr həmin şəkli həmkarlarına göndərir. Növbəti bir neçə ay ərzində Bu Adamı yuxusunda gördüklərini söyləyən daha 4 xəstə məlum olur.
İngilis dilində “This Man”, yəni Azərbaycan dilində “Bu Adam” adlandırılan bu şəkildəki obrazı həmin vaxtdan indiyədək Los-Ancelesdən, San-Pauludan, Barselonadan, Berlindən, Romadan, Parisdən, Moskvadan, Tehrandan və dünyanın bir sıra digər şəhərlərindən 2000-dən çox insan yuxuda gördüyünü söyləyib.
Amma uzun illərdir ki, internetdə fenomenə çevrilmiş, populyar mədəniyyətdə öz yerini tutmuş, çoxlu fanatları olan Bu Adam tam açıqlanmayan bir obrazdır. Fenomenə çevrilən bu şəxsi tapmaq üçün bir çox ölkələrdə və müxtəlif dillərdə elanlar yerləşdirilib. Hətta 2008-ci ildə italyan marketoloq Andrea Natella tərəfindən yaradılmış thisman.org adlı sayt da Bu Adamı yuxuda görənlər üçün açılmış saytdır. Həmin saytda bir çox dillərdə məlumatlar, elanlar yerləşdirilib.
İndiyə qədər dünyanın müxtəlif yerlərindən həmin sayta onminlərlə e-mail göndərilib, Bu Adamı yuxuda görənlər öz yuxuları haqqında məlumatlar veriblər. Yazdıqları məktublarda hətta bəziləri onu ingilis bəstəkar Endryu Lloyd Vebberə, bəziləri Misir Ərəb Respublikasının Prezidenti Əbdül Fəttah əs-Sisiyə, bəziləri də başqalarına bənzədiblər. Arud Kannan Ayya adlı bir hind qurusu da olmaqla, bəziləri isə Bu Adamın məhz özü olduğunu iddia edib; lakin onların heç biri bunu sübut edə bilməyib...
Bəs niyə bu sirli adam insanların yuxularına girir? Bunun hər hansısa qorxunc bir açıqlaması varmı? İnsanların yuxuda gördükləri iddia edilən bu sirli varlıq əslində kimdir?
Mütəxəssislərin bununla bağlı bir sıra nəzəriyyələri var. Bu müstəvidəki nəzəriyyələrdən ilki Model nəzəriyyəsidir. Həmin nəzəriyyəyə görə, bu şəxs insanların alt şüurunda yatan bir obrazdır və yalnız çətin vaxtlarda – dramatik dəyişikliklər, stressli hallar zamanı üzə çıxır, elə buna görə də o insanlara yuxuda görünür.
Bu Adamla bağlı digər bir nəzəriyyə isə onun “yuxu tədqiqatçısı” olma ehtimalıdır. Bu zaman belə bir sual meydana çıxır: o, özünün psixoloji bacarıqlarından istifadə edərək yuxulara girə bilən bir “yuxu tədqiqatçısı” ola bilərmi? Bəziləri hətta həmin şəxsin insanların yuxularına girməyi bacaran bir psixoz olduğuna da inanırlar.
Bu Adamla bağlı dini baxımdan da fikirlər bildirənlər var. Onların fikrincə, Bu Adamın görüntüsü Böyük Yaradıcının insana özünü təqdimetmə formasıdır. Bu nəzəriyyəyə görə Allah özünü bu şəkildə bir sıra insanlara göstərir.
Bəzilərinə görə də Bu Adam gerçək həyatdan olan insanların simasıdır. Hansı ki, onlar bir-birinə bənzəyirlər. Digərlərinə görə isə heç də Bu Adamı yuxuda görənlərin hamısı eyni simanı görmür. Sadəcə yuxuda gördükləri simanı ona bənzədərək, təsvir edirlər.
Bütün bu nəzəriyyələr elmi cəhətdən tam sübut olunmayıb. Nəticədə hələ də niyə minlərlə şəxsin onu yuxuda gördüyü məlum deyil.
Bəs Siz onu yuxuda görmüsünüzmü? Əgər görmüsünüzsə, buyurun, şərhlərdə bu barədə fikirlərinizi bildirin.
Musiqi: YouTube Library
The Crows Did It 2:43 Nathan Moore Sinematik | Dramatik
The Loner 2:56 DJ Williams Sinematik | Dramatik
Şəkil və mənbə: https://commons.wikimedia.org/
http://www.thisman.org/