மதுரையில் உலகப் புகழ்பெற்ற மீனாட்சி - சுந்தரேசுவரர் திருக்கல்யாணம் கோலாகலம்
மதுரை மாநகரே விழாக்கோலம் பூண்டுள்ளது! உலகப் புகழ்பெற்ற மதுரை மீனாட்சி அம்மன் கோவில் சித்திரை திருவிழாவின் சிகர நிகழ்ச்சியான மீனாட்சி - சுந்தரேசுவரர் திருக்கல்யாண வைபவம், பல்லாயிரக்கணக்கான பக்தர்கள் முன்னிலையில் இன்று வெகுவிமர்சையாக நடைபெற்றது.
முன்னதாக, நறுமணம் மிக்க வெட்டிவேர்கள், டன் கணக்கிலான வண்ண மலர்கள் மற்றும் நவதானியங்களால் அலங்கரிக்கப்பட்ட மணமேடையில் மீனாட்சி அம்மனும், சுந்தரேசுவரர் பிரியாவிடையுடனும் மணக்கோலத்தில் எழுந்தருளினர். பவளக்கனிவாய் பெருமாள் தனது தங்கையை தாரை வார்த்துக் கொடுக்கும் நிகழ்வைத் தொடர்ந்து, வேத மந்திரங்கள் முழங்கின.
காலை ரிஷப லக்கனத்தில், மீனாட்சி அம்மனுக்கு வைரத்தால் ஆன மங்கல நாண் அணிவிக்கப்பட்டபோது, அங்கிருந்த பல்லாயிரக்கணக்கான பக்தர்கள் பக்தி கோஷங்களை எழுப்பினர். இந்த புனிதமான நேரத்தில், அங்கு கூடியிருந்த சுமங்கலிப் பெண்கள் தங்கள் தாலி கயிற்றை புதிய கயிறாக மாற்றி புதுப்பித்துக் கொண்டனர்.
பல நூற்றாண்டுகள் பழமை வாய்ந்த தங்க கும்பாக்கள் மூலம் சுவாமிக்கு பன்னீர் தெளிக்கப்பட்டு தீபாராதனை நடைபெற்றது. வெயிலின் தாக்கத்தைக் குறைக்க நூறு டன் ஏசி வசதிகள் மற்றும் ஒரு லட்சம் பக்தர்களுக்கு பிரசாதப் பைகள் வழங்கப்பட்டன. பாதுகாப்புப் பணியில் மூவாயிரத்திற்கும் மேற்பட்ட காவல்துறையினர் ஈடுபடுத்தப்பட்டனர்.