السر العظيم لنجاح أي مطعم؟ أكتسبته بالفطره من أمي ((بشرى)) سبب نجاحي
يونس وعيادة المطاعم ،
هما نتيجة حبي للضيافة بالفطرة،
نتيجة اني أتربيت على مبدأ الضيافة بكل بساطه،
أتربيت على الكرم
أتربيت على العطاء
أتربيت على البشاشة
أتربيت على حب الناس
أتربيت على أحلى عزايم
أتربيت على أجمل أكل
أتربيت على اللمة
أتربيت على حب خدمة الناس
أتربيت على أن السعادة الحقيقه في سعادة اللي حواليك
أتربيت على إيد بشرى
اتربيت على دعوات بشرى
أتربيت على كلام بشرى
((والله لازم تاكل والله لازم تشرب))
((والله لو ماخلصت طبقك هازعل))
((أنت بخيل ولا ايه مش عايز تاكل عندنا))
((كمل طبقك علشان الأكل ميجريش وراك يوم القيامه))
أيوه أنا كبرت بحب المطاعم وبحب خدمة الناس
وبقيت بحس بفرحة كبيره لما أسعدهم وأعيشهم تجربة سعيدة ،
أحساس بالفطرة كده من غير ما أتعلم يعني إيه تجربه ويعني ايه اكسر توقعات ويعني ايه عميل راضي وعميل سعيد ومن غير ما أتعلم يعني ايه خدمة عملاء والله كله بالفطره،
علشان كده لقيت سعادتي في المطاعم وأنا بخدم وبأكل وبعيّش الناس تجارب متتنسيش
ولما لقيت نفسي فيها، كبرت ونجحت فيها.
وعلى فكره، سر نجاحي فيها اللي مكلمتش فيه قبل كده لا هو الخبره ولا الدراسه ولا المتابعة ولا الكلام ده خاااااااالص، يمكن ده يكون جزء.
لكن سر نجاحي في مجال الضيافة والمطاعم الحقيقي؟ هو حبي وشطارتي في صناعة الذكريات السعيدة اللي أتربيت عليها من بشرى
كان أسمها بشرى وكانت فعلا بشرى لكل واحد كان يعرفها او يشوفها او يكلم معاها.
علمتني كرم الضيافة بكل بساطه،
علمتني أكون مضياف بحق وحقيق،
علمتني العطاء والحب والخير،
علمتني ان السعاده في خدمة الآخرين،
علمتني مكرهش حد،
علمتنى أن الغنى الحقيقي في حب الناس وسعادة الآخرين مش الفلوس خالص،
علمتنى ان القوة بنكتسبها من العطاء واللين،
علمتنى البشاشه من جمال روحها،
علمتني العفو عند المقدره،
علمتنى أن كلمة بشرى لازم تكون بشرى ساره وسعيده وبشوشه.
بشرى هيا سر كل نجاح وصلت له بعد توفيق ربنا.
بشرى هيا سر نجاح عيادة المطاعم.
بشرى هيا سر نجاح كل مطعم أشتغلت فيه.
بشرى هيا سر كل كلمه قولتها او كتبتها او شرحتها في مجال المطاعم.
بشرى حالة تدّرَس ومثال نقف كلنا قدامه في الكرم والعطاء ونتعلم منه.
بشرى روح وحب وعطاء عمره ما هينتهي.
بشرى كانت وهاتفضل أجمل وأحلى بشرى في حياتي.
ربنا يرحمك يابشبش
ربنا رزقك بأحلى خاتمه زي ما كنتي بتطلبيها علطول، نتمنى كلنا ربعها،
ربنا أستجاب لكل دعوه كنتي بتدعيها ،
كلام الناس عليكي فرحني أوي وقلب حزننا عليكي لفرحه،
سبحان الله حتى وأحنا زعلانين على فراقك بتبسطينا وتفرحينا.
مكنتش متخيل يابشبش ان الناس بتحبك أوي كده
تركتي لينا ثروه عظيمه بسيرتك الطيبه وحب الناس وكلام الناس عليكي.
أنا فخور إني أبن بشرى
هافضل مكمل يابشبش زي ما علمتيني
ربنا يرحمك ويكرمك زي مأكرمتينا في حياتك وأكرمتينا بحب الناس بعد وفاتك
أدعوا ل بشرى