“Qur’on şahslarga emas, Alloh belgilagan yölga sodiq bölişni buyuradi”.
“Ўзинг бизни тўғри йўлга сол! Бахт-неъмат берганинг кишилар йўлига, ғазаб(ин)га дучор бўлмаган ва адашмаганлар йўлига сол!”. (“Фотиҳа” сураси, 6-7-оятлар)
“Барчангиз Аллоҳнинг арқонини маҳкам тутинг ва бўлиниб кетманг! Ва Аллоҳнинг сизга берган неъматини эсланг: бир вақтлар душман эдингиз, бас, қалбларингизни улфат қилди! Унинг неъмати ила биродар бўлдингиз. Ўтли жар ёқасида эдингиз, сизни ундан қутқарди. Аллоҳ сизга Ўз оятларини ана шундай баён қилади. Шоядки, ҳидоят топсангиз”. (“Оли Имрон” сураси, 103-оят)
“Эй, иймон келтирганлар! Ўзингиз, ота-онангиз ёки яқинларингиз зарарига бўлса ҳам, Аллоҳ учун тўғри гувоҳлик беринг! У бой бўлса ҳам, камбағал бўлса ҳам, Аллоҳ иккисидан-да ҳақдорроқ. Орзу-истакларга эргашиб, адолатни тарк этманг! Агар гувоҳликда тил бурсангиз ёки адолатдан чекинсангиз, Аллоҳ барча қилмишингиздан хабардор”. (“Нисо” сураси, 135-оят)
Қуръондаги мана шу ва бошқа оятлар мусулмон киши шахсларга эмас, Аллоҳ белгилаб берган ҳидоят, тўғрилик, адолат ва яхшилик йўлига дўст ҳамда содиқ бўлишни буюради. Бу таълимотга кўра, агар бир одам иккинчи одамга ёки иккинчи одамнинг яқинларига яхшилик қилган бўлса-ю, бироқ Аллоҳ белгилаб берган йўлдан четга чиқса, Аллоҳнинг арқонини тарк этса (бошқа одамларга, динга ва мусулмонларга зарар етказса), иккинчи одам ундан кўрган яхшилигидан ҳижолат чекмасдан, уни яна тўғри йўлга, арқонга қайтаришга ҳаракат қилиши, унга насиҳат қилиши, керак бўлса, уни танқид қилиши талаб этилади. Яъни, Қуръонга кўра, мусулмон киши шахсларга эмас, Аллоҳ ўрнаган стратегияга содиқ қолиши керак.
Қуръондаги мана шу концепцияга кўра, ҳақиқий дўстлик ва содиқлик шахсларга эмас, Аллоҳ белгилаб берган стратегияга бўлган дўстлик ва содиқликдир. Ҳудди шундай, чин хиёнат ва кўрнамаклик ҳам шахсларга нисбатан эмас, Аллоҳ буюрган тўғри йўлга нибсатан қилинган хиёнат ва кўрнамакликдир. Қисқаси, чин садоқат Аллоҳ кўрсатган йўлга кўрсатилган садоқатдир, асл хиёнат ва кўрнамаклик эса ана шу йўлга қилинган хиёнат ва кўрнамакликдир.
Бобомурод АБДУЛЛА,
мустақил журналист ва собиқ сиёсий маҳбус
2024 йил 29 Кунқизар
@faktvafikr2021