Ma F'nêt'
Ma F'nêt'
Ma f'nêt', oh! combein d'temps qu'j'y pâsse!
Car jé n'fais pus grande chose.
Jé n'vai pus comme aut' fais;
et quant à mes vièrs dés,
il est temps qu'i' s'èrpôsent.
Ma f'nêt' est tout chein qu'j'aime au monde
car j'n'ai ni cats ni tchians;
quand man pèrrot mouothit
j'voulis pas l'rempliaichi;
et j'ai perdu m's êfants.
Ma f'nêt' est bein pathelle à d'aut':
ou n'a qu'ses huit ôsaines.
Pas d'câsse en bouais vèrni :
du sape - un mio pouôrri; -
mais - j'y'ai mes gérémiennes!
Ma f'nêt', i' faut bein qué j'l'admette,
n'a qu'des flieurs bein commeunes,
chein qué j'peux m'affaûrder,
pas ch'qué j'voudrais aver - !
Mais j'n'en vendrais pas ieune!
Ma f'nêt' avec ses gérémiennes
et san lis êpanni!
Ch'est man gardîn à mé!
Et châtchun l'dit si bé,
malgré qu'i' s'sait si p'tit.
Ma f'nêt' est belle, ah! s'ou savêtes
combein qu'les gens l'admithent;
combein qu'mes deux-trais flieurs
ont dêjà fait d'envieurs;
qué d'èrgards oulle attithe!
Ma f'nêt', au matîn, est si fraîche
auve ses flieurs et feûgiéthes!
J'y tcheins de pus en pus,
et tandi qu'j'ai l'yi d'ssus.
j'oublyie un tas d'mînséthes.
Ma f'nêt', à mé, si triste et pauvre,
tch'ai veu ma septantchième;
ou n'savez pas chein qu'ch'est
ni combein d'cas qu'j'en fais!
Jé l'aime, ah! comme jé l'aime!
Elie (1881-1918)