ЕҰУ-да «Менің бауырым» жобасы басталды
Л.Н. Гумилев атындағы Еуразия ұлттық университетінде «Менің бауырым» студенттік волонтерлік жобасын іске асыру туралы келісімге қол қойылды. Құжатқа ҚР Оқу-ағарту министрі Ғани Бейсембаев пен Ғылым және жоғары білім министрі Саясат Нұрбек қол қойды.
ЕҰУ студенттерін құттықтаған Ғылым және жоғары білім министрі Саясат Нұрбек өз сөзінде бұл жобаның Халықаралық студенттер күнінде бастау алғанының символдық мәні зор екенін атап өтті.
Білім министрі Ғани Бейсембаев атап өткендей, «Менің бауырым» жобасы балалардың құқықтарын қорғауға және балалық шақ саласындағы жобаларды тиімді басқаруға бағытталған. Жоба аясында мектеп оқушылары үшін қауіпсіз, қолдау көрсететін және дамытатын білім беру ортасын құру бойынша шаралар қабылданатын болады.
Астанада елордамыздың 171 мектебіне қолдау көрсететін 12 жоғары оқу орнының 1300 студентінен тұратын еріктілер командасын құру жоспарлануда. Кейін бұл жобаға басқа өңірлер де қосылмақ.
Педагогика, Құқықтану, Психология, Әлеуметтік педагогика және Ақпараттық технологиялар (IT) мамандықтары бойынша 3-5 курстарда оқитын ЖОО студенттері ерікті бола алады. Оқыту тренингтерінен өткен соң оларға балалар және жасөспірімдермен мектептерде қалай жұмыс істеу керектігі туралы нұсқау беріледі.
Университеттер еріктілер жасақтарын құрып, қала әкімдігінің білім бөлімінің қолдауымен мектептерде олардың жұмысын ұйымдастырады. Әдістемелік қолдауды Қазақстан Республикасы Оқу-ағарту министрлігінің «Өркен» балаларды қорғау ұлттық ғылыми-практикалық институты жүзеге асырады.
Ұйымдастырушылардың айтуынша, бұл жоба балалар құқығының бұзылуын азайтады.
Айта кетейік, Л.Н.Гумилев атындағы Еуразия ұлттық университетінде ЖОО белсенділерін біріктіретін ENU Volunteers клубы табысты жұмыс істеуде. ЕҰУ еріктілері жыл сайын әлеуметтік жобаларды жүзеге асырып, қоғамдық маңызды іс-шараларға қатысып келеді.