Кешегі талапкер – бүгінгі курсант – ертеңгі офицер
Сағадат Нұрмағамбетов атындағы Құрлық әскерлерінің әскери институтында жас талапкерлерді оқуға қабылдау мандаттық комиссиясы өз жұмысын аяқтады.
11 сыныпты бітіріп келген талапкерлер медициналық комиссия, психологиялық тест және дене дайындығынан сынақтар тапсырып оқуға қабылданып жатса, мерзімді әскери қызметтерін өтеп жатқан немесе аяқтаған азаматтар тек медициналық комиссиядан өтіп оқуға қабылданды. Бұл бастама Қорғаныс министрлігінің “Срочники 2.0” бағдарламасы аясында жүзеге асуда.
Мандаттық комиссиядан өту барысында талапкерлер өз шешімдерін тандап, институттың 15 мамандығына бөлінді. Оның ішінде аса көп сұранысқа ие болған мамандықтар қатарында мотоатқыш, барлау әскерлерін басқару және тылдық қамтамасыз ету бар.
Бүгіннен бастап кешегі талапкерлер курсант атанып, әскери институттың бірінші курсына қосылды.
Курсанттардың болашақта өз еліне, жеріне адал қызмет атқаратын офицер болуларына тілектеспіз.