2015 Назерке Торпақованың «Өнерім - өмірім» жеке көрмесі
Н. Торпақова 1996 жылы Қаскелең қаласында дүниеге келді. 2002 жылы Абай атындағы мектеп-гимназияға оқуға қабылданып, оны үздік бітіріп шығады. Бала кезінен Назерке өмір тауқыметімен бетпе-бет келді. Бойындағы сырқатына қарамастан, үмітін үзбеді, қайта өз бойынан өнердің жаңа қырларын тапты. Сөйтіп, оның шығармашылығы жай ғана уақыт өткізу үшін ермек емес, оның сырқатынан жазылуына дауа болған жолдардың біріне айналды.
Орындау техникасы Назеркенің көркемдік дарынының ұшталуына жәрдем болды. Туа біткен шебердің қолынан түстік үйлесімін тапқан тұтас дүниелер жасалып шығып жатады. Меруерттей құбыла шашылған моншақ суретшінің матасына ерекше тербеліс пен саздылық бітіреді.
Көрмеге декоративтік техника – моншақпен кестеленіп жасалған 47 жұмыс қойылды.
Тамырын тереңге жіберген бұл техника осыдан 6 мың жылдай уақыт бұрын алғашқы шыны моншақтар пайда болған кезеңдегі шыны жасау дәуірінен бастау алады. Уақыт өте келе технологияның жетілуіне байланысты моншақтар әдемілене түседі, ұсақ, жұмыр немесе көп қырлы, жіп өткізуге арналған тесігі бар аздап жапырылған түрлі моншақтар пайда бола бастайды. Бусра немесе бусер сөзі араб тілінен шыққан, Мысырда дайындалған «жасанды маржан» дегенді білдіреді.
Бүгінде моншақ әдемі сәнді бұйым жасайтын саланың бәрінде қолданылады. Олармен киімдерді, түрлі керек-жарақтарын безендіріп, кесте төгеді. Бұл орындалуы өте күрделі, бірақ өте әдемі де сұлу техника талай шебердің шығармашылығына дем берді. Сондай шеберлердің бірі – осы «Өнерім – өмірім» көрмесінің авторы Назерке Торпақова.