7 қатыны бар ХАН
#youtube #youtubeshorts #тоқал
НАҒЫЗ ЕРКЕК
Баяғыда бір ханның жеті қатыны болыпты. Жеті қатыны жеті жерден миын шаққанда «осылардың-ақ, дегені болсыншы» деп айтқанын істей салады екен. Сол хан, бір күні ойланып отырып:
«Хан басыммен менің түрім мынау. Құлағымның тыныштығын ойлап қатынның айтқанымен жүремін. Қараша байғұстар қалай күнелтіп жүр екен?» деген ой келеді. Дереу уәзірін шақырып:
«Қарашамның ішінен қатынның айтқанымен жүрмейтін нағыз еркек болса үйірден таңдап ат міңгізіңдер» дейді. «Құп, тақсыр!» деген уәзірлері ел арасынан «нағыз еркекті» іздеуге кіріседі. Бірақ лайықты адам таппай көп сандалады. Сарайға қайтар жолда бір қараша үйге түсіп «нағыз еркекті» іздеп жүргендерін айтады.
– Нағыз еркек – мен дейді үй егесі. – Қатынның дегенімен жүрмеймін. Бәрін өзім шешемін...
Уәзірлер қанша сынаса да әлгі еркектен мін таппайды. Ақыры нағыз еркекті тапқанына қуанған уәзір:
– Үйірлі жылқыдан таңдап біреуін ал. Сауынға бие аласың ба, мініске ат аласың ба? – дейді. Осы жерде ойланып қалған отағасы үйіне қарап дауыстап:
– Әй, қатын, шықсайшы бері. Мына жылқылардың қайсысын аламыз деген екен.
«Қабырғаңмен кеңескенің дұрыс»,– дейді дана қазақ. Кеңесе келе кесімді сөзді отағасы айтқан. «Келісіп пішкен тон, келте болмас» дейтіні тағы бар. Бұл кеңестің отбасының ынтымағына қосар үлесі бір бөлек!
Ал енді, қатынның айтқанымен жүретін хандікі дұрыс па, қабырғасымен кеңескен қарашанікі дұрыс па? Ара жігін өзіңіз аша жатарсыз, құрметті оқырман!
Айдар ТЕМІРБЕКҰЛЫ