Bakıda reyddə xanım sürücü ilə polis davası
Bakıda qaydanı pozan xanım sürücü avtomobili ilə birlikdə evakuatora mindirildi
Ötən gecə Bakıda yol polisi əməkdaşları qadın sürücünün müqaviməti ilə üzləşiblər.
Polis əməkdaşları Neftçilər prospektində yol hərəkəti qaydasını pozan “Hyundai” markalı avtomobilin xanım sürücüsünə “saxla!” əmri versələr də, o, hərəkətini davam etdirib.
Yaradılan süni tıxac nəticəsində avtomobil saxlanılıb. Lakin sürücü avtomobilin qapılarını bağlayaraq, sənədlərini polis əməkdaşına verməkdən imtina edib. Yoxlama zamanı məlum olub ki, Viktoriya Vlasovanın idarə etdiyi avtomobil axtarışdadır. O, iki ay əvvəl yol-nəqliyyat hadisəsi törədərək ərazidən yayındığı və banka borclu olduğu üçün axtarışa verilib.
Sənədlərini polis əməkdaşına təqdim etməyən xanım sürücü mobil telefonla tanışı ilə danışdıqdan sonra sükan arxasından sərnişin yerinə keçib. Vəziyyətə görə əraziyə əməliyyat qrupu cəlb edilib. O, avtomobildən düşmədiyindən, evakuator da çağırılıb. Avtomobil sürücü ilə birgə evakuatora mindirilib və cərimə meydançasına aparılıb. Ancaq xanım sürücü cərimə meydançasında da avtomobildən düşməyib.