Нүүдлийн зэрлэг амьтад ба стандарт
Манай улс зэрлэг амьтдын амьдрах орчин, нүүдлийн замд үзүүлэх сөрөг нөлөөллийг бууруулахаар ажлын хэсэг байгуулан ажилласны үр дүнд Азийн орнуудаас анх удаа зэрлэг амьтдад ээлтэй гарц, гарам байгуулах хоёр стандартыг баталсан.
Тодруулбал “Тал хээр, говь цөлийн бүсийн авто болон төмөр зам дагуу зэрлэг амьтдад зориулсан гарц, Ерөнхий шаардлага MNS 6515:2015” Монгол Улсын стандартыг 2015 онд баталсан. Энэ нь Монголд төдийгүй дэлхийд ховор хулан адуу, хар сүүлт, цагаан зээр, монгол бөхөн зэрэг туурайтан амьтдад зориулсан гарц хийж, тэдгээрийг хамгаалах зорилготой юм. Мөн 2018 онд “Уулархаг нутгийн зам, замын байгууламжийн нүүдлийн зэрлэг амьтдад зориулсан гарц, Ерөнхий шаардлага MNS 6735:2018” Монгол Улсын стандартыг баталсан.
Тус стандартуудын дагуу дээр дурдсан тал хээрийн туурайтан амьтдаас гадна уулархаг болон ойт бүсийн аргаль хонь, янгир ямаа, молцог хандгай, халиун буга, бор гөрөөс, цаа буга, зэрлэг гахай, баданга хүдэр, цоохор ирвэс, шилүүс зэрэг зэрлэг амьтдын нүүдэл шилжилтийн судалгаанд үндэслэн амьтад авто болон төмөр замыг нэвтрэн гарах гол нүүдлийн болон гүйдлийн тохиромжтой байршилд хангалттай тоогоор тохирох гарцыг зөв төлөвлөн байгуулах нь чухал юм. Ингэснээр зэрлэг амьтдын нүүдэл, шилжилт, хөдөлгөөнийг авто болон төмөр замаар аюулгүй, чөлөөтэй нэвтрүүлэх, эко системийн нэгдмэл байдлыг ханган, хамгаалж буй явдал юм.
#зэрэгцэнамьдаръя #USAID #WWFMongolia #cllc #ALIGN