БИ ӘЛЕМІНДЕГІ ТҰҒЫРЫ БИІК НҰРСҰЛУ
БИ ӘЛЕМІНДЕГІ ТҰҒЫРЫ БИІК НҰРСҰЛУ
Ақтөбеде қазақтың тұңғыш балет бишісі, Қазақ КСР-нің еңбек сіңірген артисі Нұрсұлу Тапалованың 100 жылдығына арналған «Би биігіндегі ғұмыр» атты республикалық практикалық конференция өтті.
Облыстық халық шығармашылығы орталығы мен Ғ.Жұбанова атындағы облыстық филармония ұйымдастырған көлемді шараға фото және кітап көрмелері, саңлақ биші туралы «Би әлемінің биігі» атты деректі фильмі көрсетіліп, «Аққу» республикалық бишілері байқауының I кезеңі өтті. Сондай-ақ би ұжымдары мен жетекшілеріне арналған шеберлік сағаты ұйымдастырылды.
Тапалованың өнердегі, өмірдегі тұлғасын насихататуға бағытталған конференцияның жұмысына Астана, Алматы, Шымкент, Ақтау қалаларынан би өнерінің саңлақ мамандары, қызы Тоты Шоқырқызы, өңірдің зиялы қауым өкілдері, ойылдықтар, жастар, еліміздің барлық өңірлерінен би ұжымдары және жетекшілері қатысты.
Атап айтсақ, Қазақстанның ең¬бек сіңір¬ген артисі, өнертану кандидаты, Қазақ ұлттық хореография академиясы «Балетмейстер өнері» кафедрасының профессоры Тойған Ізім (Астана қ.), философия ғылымдарының докторы, профессор, Қазақстанның мәдениет қайраткері, білім беру ісінің үздігі, Халықаралық ақпарттандыру академиясының академигі Серәлі Тілеубаев (Шымкент қ.), М.Өскінбаев атындағы Маңғыстау облыстық филармониясының балетмейстері, «Жорға» би ансамблінің негізін қалаушы, «Шапағат» медалінің иегері, Қазақстанның мәдениет саласының үздігі, режиссер-хореограф Серік Сариев (Ақтау қ.), Қазақстанның мәдениет қайраткері, Н.Тапалованың шәкірті Гүлжан Сағыноваға, «Ойыл» ынталы тобының басшысы, өлкетанушы Нұрлан Жұмағалиев, Ойыл аудандық ішкі саясат, мәдениет, тілдерді дамыту және спорт бөлімі басшысының орынбасары Шамшырақ Жоламанова сынды қонақтар сөз сөйлеп, Нұрсұлу Тапалованың қазақтың кәсіби би өнерінің даму жолындағы рөліне тоқталып, оның өмірі мен шығармашылығы төңірегінде айтып, естеліктерімен бөлісті.