不是回流之快閃香港Vlog 1: 究竟香港變左幾多？
我都話我年尾要黎個終極流量密碼架啦，當然就係啲KOL最鍾意玩嘅標題黨之敗走回港啦。講真，我份人不嬲就唔玩標題黨嘅，2022年敗走澳洲固然係真，今次快閃香港都會好均真地加個「不是」，咁至於今次點解要返香港，當然係因為要處理私務啦。其實你問我對香港留唔留戀，香港係我生活左四十幾年嘅地方，佢當然帶比我好多回憶啦，但當你喺異鄉已經慢慢搵到自己嘅定位，生活都好愜意，你自然會Move On。今集我會帶大家去睇下我由細到大住嘅地方：灣仔大佛口、成日都流連嘅跑馬地我嘅堂區，當然仲會例牌發表一下偉論，對於嗰啲怨天怨地嘅香港人，我一向都玩開「戰狼社交」，總之番到黎想睇喜極而泣咸苦咸忽嘅，又或者一千萬個理由講呢度有幾差所以去英國無悔下刪三千字嗰啲自圓其說，呢度無你想睇嘅嘢，去搵第二啲Youtuber啲片睇啦！
我嘅哲學從來都係，你知道自己決定係啱，真係Move On咗嘅話，你係會接納香港仲係一個有一定吸引力嘅地方，都會接受呢個地方已經唔再需要你嘅參與，我今日嘅心態係，I wish HK all the best，都相信自己the best is yet to come ，無論你選擇留低定離開，只有自己過得唔多好嘅人，先會成日咁緊張啲喺外國生活嘅人到底有幾攞黎賤又話人做乜死番黎，又或者幻想留低嗰啲人有幾咁無奈同生不如死無勇氣同佢哋一齊捱。我都話我係戰狼社交嘅啦，最鍾意就係兩邊啲人都得罪晒。