英國定居生涯Vlog Ep.19之樓下爆喉發噏風：職場點滴；我的社區St Johns Wood好住嗎
話說兩個星期前樓下突然爆水喉，朝早起身啲水得番一條線，不過最慘都係樓下間屋全浸加無電，都唔知有無保險賠，對我黎講嗰日全日無水幾乎想喺酒店過，好彩夜晚有番。
喺出去避風頭嘅時候，諗番起喺St Johns Wood都住左年半咁滯，呢個社區我真係好鍾意，係衰在堅貴，加上離我返工又遠，所以我都諗緊好唔好搬去近番自己公司而且月租平啲嘅屋，但呢個區實在已經同我有住千絲萬縷嘅關係，由鄰居到餐廳老闆都同我好熟，所以要我搬真係有啲唔拾得。
都諗到自己返工，經過呢四個月，我由一個獨家村，到而家成公司啲人都知我係一個諧星同我好多嗲，連之前同我嗌交嗰位都同我Friend番（至少表面上），老闆都好錫我（雖然都因為咁超多嘢做，朋友都話任勞任怨），突然諗起Small Talk，唔係夾硬搵話題，係好講你嘅Energy，大家Team Work，公事上你幫到手，私事上你癲癲地，好快就會同人熟，呢樣其實我一向都幾驕傲嘅，係遺傳自我阿婆求其去街市都可以同個三唔識七嘅人嗲嘅社交手腕，更重要嘅就係，做人唔好太多計算，識保護自己，都肯蝕少少底，人在做天在看，其實大家係會睇到嘅。
片尾又有我唱嘅歌仔，我的確無喺香港搵番咁多錢，但喺呢個社區，有呢種生活，至少現時對我黎講，夫復何求。
0:00 吹水開始
13:05 唱下歌仔睇下風景之唔多陰天嘅《陰天》