Мұнай және газ министрі Қашағанға қатысты түсініктеме берді
Қашаған құбырының теңіз бөлігіндегі зерттеу жұмыстары мамыр айында аяқталады. Бұл туралы бүгін Парламент Мәжілісіндегі Үкімет сағатында Мұнай және газ министрі Ұзақбай Қарабалин мәлім етті. «Сәуір айында құбырдың теңіз бөлігіндегі 25 нүктесінде зерттеу жүргізіледі. Алайда, бұл тек мұз ерігеннен кейін мүмкін болады», - деді министр. Естеріңізге салсақ, өткен жылдың күзінде мұнай өндіріле бастаған Қашаған кен орнының құбыр инфрақұрылымында біраз проблемалар анықталып, жұмыстар уақытша тоқтатылған. Ведомство басшысының айтуынша, бастапқыда зерттеу жұмыстарының аяқталуы наурызға жоспарланғанымен қазір бұл мерзім өзгерді. Өйткені теңіз жағындағы құбырларда ақау бар деген болжам бар. «Сондықтан аталмыш кен орнында нақты қашан мұнай өңдеу жұмыстары жалғасатыны әзірше белгісіз», - деді Қарабалин.
Ұзақбай Қарабалин, ҚР Мұнай және газ министрі:
-Қондырғы жіберіп, жарықтар бар ма, жоқ па, соны қарау керек. Оның өзі тек ондай ақау бар болуы мүмкін дегенді көрсетеді. Сосын оны ашып, ультрадыбыс приборларымен анықтау керек. Қазір теңіздің бетінде мұз болғандықтан, жұмыс жасалынбай жатыр. Енді мамырда ғана жұмыс бітеді, соның нәтижесін күтудеміз.
Сондай-ақ Үкімет сағатында Мұнай және газ министрі депутаттардың көптеген сауалына жауап берді. Мысалы, 4-ші мұнай өңдеу заутының салынуына байланысты қазір бірнеше нұсқау Үкімет деңгейінде талқыланып, Елбасының қарауына жіберілген. Ал Астанаға газ тарту мәселесіне Қарабалинның айтуынша, кем дегенде 1 миллиард доллар қажет. Сондықтан Экономика және бюджеттік жоспарлау министрлігі жобаны тым қымбат деп танып, оны іске асыру мерзімі кейінге шегерілді.