Түркістан қаласына газ беріле бастады
Болат Көкенайұлы, Тілші:
-Тек қана Оңтүстік Қазақстан облысы ғана емес, күллі Алаш жұрты үшін киелі мекен саналатын Түркістан халқы бұл қуанышты 50 жылдан астам уақыт күтті. Өткен ғасырдың 60-жылдары басталған бұл жоба сол күйі аяқсыз қалған еді. Енді міне шаһар жұртшылығы Тәуелсіздіктің жемісін көріп отыр.
Рахман Салыұлының отбасы осыдан 20 жыл бұрын Елбасының шақыруымен Атамекенге Ираннан қоныс аударыпты. «Содан бері өстік, өндік, еңбектің арқасында әл-ауқатымыз жақсарып келеді. Енді міне тағы үлкен қуанышқа кенеліп отырмыз», -- дейді ол.
Әзиза Әбдіхалил, Түркістан қаласының тұрғыны:
-Үйіміз жылы, шайымыз қайнаулы. Енді пеш жағудан, отын тасудан құтылдық.
Рахман Салыұлы, Түркістан қаласының тұрғыны:
-Елбасымыз осыншама жақсылық істеп жатыр. Қаламызға газ келді, үйімізге газ келді. Ел-жұрттың атынан, өз отбасымның атынан, түркістандықтар атынан мың да бір алғыс айтам!
Елбасының Жолдауындағы міндеттерге сәйкес Қазақстанды тұтастай газбен қамту жоспары тұр. Оның ішінде «Бейнеу-Бозой-Шымкент» жобасының орны ерекше.
Серік Сұлтанғалиев, «ҚазТрансГаз» АҚ Бас директоры:
-Компрессорлық стансалар көбейгеннен кейін 16-жылы 10 млрд. текше метр газға дейін болады. Елбасының тапсырмасымен ең бірінші әлеуметтік жағынан халқымызды қамтамасыз етеді, қалғаны Қытай Республикасына барады.
Түркістандағы көгілдір отын тұтыну көлемі жылына 100 миллион текше метрді құрайды. Жоспар бойынша қаланы газбен қамту 4 кезеңмен жүзеге асады. Келесі жылы 7 мың абонентті іске қосу межеленіп отыр.