Елбасы Мұнай және газ министрі Ұзақбай Қарабалинді қабылдады
Елбасы Мұнай және газ министрі Ұзақбай Қарабалинді қабылдады
20 қаңтар 2014, 19:07
Былтырғы жылдың қорытындысы бойынша елімізде 81,8 млн. тонна шикі мұнай өндірілді. Яғни, бұл 2012 жылмен салыстырғанда 103,2 процентке орындалғанын көрсетеді. Аталған деректер жайында бүгін Мемлекет басшысының қабылдауында болған Мұнай және газ министрі Ұзақбай Қарабалин мәлімдеді.
Ведомство басшысы Елбасына министрліктің өткен жылғы жұмыс қорытындылары мен Президент Жолдауы жүктеген стратегиялық міндеттер туралы баяндады. Министрдің мәліметінше, былтыр республикамызда өңделген мұнай көлемі 14,3 млн. тонна болса, өңделген газ көлемі 42,3 млрд. текше метрді құрады. Ал, биылғы жылы 83 млн. тонна мұнай мен 41 млрд. текше метр газ өндіру жоспарланып отыр. Президент сала басшысына инвестиция тартудың және инновациялық дамыту жөніндегі жұмысты күшейтудің маңыздылығын атап, ірі мұнай-газ кен орындары жанынан өндірістік кластерлер құру қажеттігіне ерекше назар аударды.
Ұзақбай Қарабалин, ҚР Мұнай және газ министрі:
Кешегі Елбасының Жолдауы бойынша жасалатын жұмыстардың бағытында талқылап, болашақта үлкен мұнай-газ кен орындарының айналасында сервистік компанияларды дамыту, сондай-ақ, мұнай-газдың өзінің де тиімділігін арттыру және Елбасына төрт жылдан бері жасалып біткен мұнай-газ кен орындарының атласы, бассейндердің атласы көрсетілген болатын.