Еуразиялық экономикалық одақ мұнайшыларға жаңа мүмкіндіктер береді
Еуразиялық экономикалық одақ Қазақстанның мұнайшылары үшін жаңа мүмкіндіктер ашады. Мәселен, Қазақстан шикізатты транзитінің ең тиімді шараларын қарастырып, одан өзге мемлекеттердің нарығына шыға алады. Жалпы, мұндағы мақсат - қатысушы мемлекеттердің экономикалық дамуын жақсартып, қоғамның өмір сүру деңгейін көтеру.
Еуразиялық экономикалық одақ құрылған кезде кеңістік елдерінің мұнай-газ саласындағы құбырлар жүйелері барлық қатысушы мемлекеттерге тең дәрежеде қолжетімді болмақ. Яғни, Қазақстан еш қиындықсыз Ресей немесе Беларусьпен шекаралас жатқан елдерге де шикізат экспорттауға мүмкіндік алады.
Ұзақбай Қарабалин, ҚР Мұнай және газ министрі:
Экономикалық одақ құрылған кезде біздің мұнайымызды транспорттау, оны экспортқа шығару әлде қайда жеңілдейді деп есептейміз. Соның ішінде ол екі жақтың, үш жақтың транспорттық тарифтері бірегей болғандықтан, ол негізі төмендейді деп есептейміз. Сонда біздің бұрынғы экспортқа шығарып жүрген бағаларымыз әлі де көтеріледі және пайдамыз көбейеді деп жатырмыз.
Тағы бір артықшылық. Еуразиялық экономикалық одақ аясында Кеден одағына мүше мемлекеттердің мамандары еркін тәжірибе алмасып, өзі қалаған мұнай кәсіпорнында еңбек ете алады.
Ұзақбай Қарабалин, ҚР Мұнай және газ министрі:
Қазақстандық бір бөлек мамандарды Ресейдің жерінде де, Белоруссияның жерінде де жұмыс жасағысы келетіндері бар. Соның ішінде мұнай саласында да аз емес. Бірақ, оларға бүгінгі күнге дейін жұмыс жасаған кезде ол жерден рұқсат алу, тағы басқа жағдайлары олардың жұмысына кедергі келтіретін еді, енді одақ құрылғаннан кейін, ол жерге ашық түрде барып, ешқандай қиыншылықсыз, өзінің талап еткен, өзіне жақсы, ұнайтын жұмыстарын жасауына мүмкіншіліктер береді.
Сондай-ақ, болашақ мұнайшыларды дайындау кезінде де шәкірттер үшін қолайлы жағдайлар жасалмақ. Яғни, студенттер экономикалық одақ аясындағы елдерде құжатбастылық мәселесінен арылады. Сәйкесінше, шәкірттердің алаңсыз білім алуына мүмкіндік ұлғаяды.