Жақын арада елімізде газ бағасы қымбаттамайды
1580 теңгеден 10 мың 500 теңгеге дейін. 1 текше метр газдың құны бір ғана Маңғыстау облысында осылай құбылады. Сондықтан газ секторындағы баға мәселесін ретке келтіруге Үкімет ерекше көңіл бөліп отыр. Қазір Табиғи монополияларды реттеу агенттігі аймақтардағы газ бағасын теңестіру жұмыстарын жүргізуде. Ведоство басшысы Марат Оспановтың айтуынша, бірінші мамырға дейін әр облыс үшін газдың бірыңғай бағасы бекітіледі. Бұл ретте өңірлердің әлеуметік жағдайы әрі газ қорының бар-жоғы ескеріледі.
Ұзақбай Қарабалин, ҚР Мұнай және газ министрі:
-Ол барлық облыстарға бір баға болады деген сөз емес. Әрбір облыстың ішінде қазір айтып отырмын әртүрлі бағалар бар. Соның барлығын бір жүйеге келтіріп, әр өңірде бір баға болады. Ұлттық оператор «ҚазТрансГаз» аймақтарға сатады. Одан кейін «ҚазТрансГаз», ТМРА және жергілікті әкімдіктер бірлесіп, облыс ішінде класстар мен категорияларға қарай бағаны келтіреді.
Салалық министрлік болса осыдан екі жыл бұрын қабылданған газ бағасын айқындау ережесіне түзетулер енгізіп жатыр. Жаңартылған құжат бойынша, 1 мамырдан бастап «ҚазТрансГаз» ұлттық операторы жер қойнауын пайдаланушылармен министрлік бекіткен баға бойынша газды сату және сатып алуға қатысты жаңа келісімдер жасайды.
Серік Ахметов, ҚР Премьер-министрі:
-Халық үшін маңызды мәселе -- тарифтер құны. Ал Табиғи монополиялар субьектілері, операторлар мен коммуналдық қызмет ұйымдары өздері үшін тиімді тарифтердің болғанын қалайды. Енді екі тарапқа да ұтымды болатын ортақ шешім қабылдануы тиіс. Халықтың да қалтасы қағылмай, монополиялық субьектілер де шығынға батпауы қажет. Тағы да ескертіп айтамын, газ бағасының күрт қымбаттауына жол берілмеуі керек.
Қазақстан авиациясы биыл ИКАО-ның «сұр тізімінен» шығуы керек. Күн тәртібінде министрлер кабинеті қараған екінші мәселе елдегі азаматтық авиацияны дамытуға арналды. Айта кетейік, бүгінде Қазақстанның бірқатар әуе компаниялары Еуроодақтың «қара тізіміне» енген. Сол себепті оларға кәрі құрлықтың әуе кеңістігіне кіруге рұқсат жоқ.
Серік Ахметов, ҚР Премьер-министрі:
-«Қазақстан-2050» стратегиясында ел Президенті отандық көліктік-логистикалық жүйені дамытуға қатысты нақты тапсырмалар берді. Құжатта Қазақстанның транспорттық әлеуетін арттыруда азаматтық авиация саласының маңызды роль атқаратыны айтылған. Сондықтан бұл саланы жаңа деңгейге көтеру үшін біз бар күшімізді салуымыз керек.
Жалпы Қазақстандағы 60 әуе компаниясының 48-інің қызметі Халықаралық азаматтық авиация ұйымының талаптарына сәйкес келеді. ИКАО инспекторлары 8-інің сертификатын қайтарып алса, отандық 4 әуе компанияның қызметін тоқтатқан.